29 oktyabr Türkiyənin Cümhuriyyət bayramı günüdür.
Ötən əsrin 20-ci illərində dünyanın ən böyük səltənətlərindən biri olan Osmanlı dövləti baş verən tarixi proseslər nəticəsində paramparça olmaq təhlükəsi ilə üzbəüz qaldı. Belə çətin və qarışıq dövrdə Türk millətinin milli iradəsini və çoxəsrlik dövlətçilik ənənələrini yaşatmaq üçün ölkədəki siyasi quruluşun çağdaş dövrə uyğun təsbit olunması məsələsinin böyük əhəmiyyəti var idi. Bu zaman Mustafa Kamal Paşanın rəhbərliyi ilə Qurtuluş savaşından keçən Türkiyədə Cümhuriyyət elan olunması qərara alındı. Uzun əsrlər boyu çoxmillətli türk-islam monarxiyası şəklində varlığını yaşadan Türkiyə dövləti ölkə parlamentinin - Böyük Millət Məclisinin 29 oktyabr tarixli qərarı ilə həyatına respublika kimi davam etməyə başladı.
Cümhuriyyətin elanından sonra dövlətin ilk prezidenti seçilən Mustafa Kamal Atatürk Türkiyənin Osmanlı İmperiyasından yeni siyasi rejimə faktiki keçidini şərtləndirən genişmiqyaslı islahatlar həyata keçirdi. Artıq 98 ildir, 29 oktyabr Türkiyənin Cümhuriyyət bayramı kimi bütün ölkədə təntənəli şəkildə qeyd olunur.
Azərbaycan Yüksəliş Partiyası qardaş ölkənin Cümhuriyyət bayramını təbrik edir, Azərbaycan və Türkiyə cümhuriyyətlərinin dostluğunu ölkələrimiz arasında əməkdaşlığın təminatı kimi görür.