"Anar Əsədli Ramazan Bayramının ilk günü, tələm-tələsik həbs edildi".

Bunu "Sherg.az"a açıqlamasında Azərbaycan Yüksəliş Partiyası Başqanının Beynəlxalq məsələlər üzrə müavini, tibb üzrə fəlsəfə doktoru, ictimai xadim Vasif İsmayıl Anar Əsədlinin məhkəmə prosesindən danışarkən deyib.

O bildirib ki, dünən Apellyasiya şikayəti verilib: "Lakin Apellyasiya şikayətimizi təmin etmədi və Anar Əsədlini həbsdə saxladı. Həmçinin belə bir sual yaranır ki,Anar Əsədli bu qədər təcili həbs edilmə ehtiyacı yaranan hansı böyük cinayəti törədib? Çünki bu işlə tanış olan tanınmış hüquqşünaslar bir mənalı şəkildə burada heç bir cinayət tərkibinin olmadığını söyləyiblər. Mən də iddia edirəm ki, Anar Əsədlinin üstünə yıxılan şikayətlərin heç birində cinayət tərkibi yoxdur. Əsas şikayətçi olduğu bildirilən şəxsin televiziyada verdiyi müsahibəni, bir hüquqşünas dinləsə, burada heç bir cinayətin olmadığını açıq şəkildə görə bilər. Əgər bu işdə cinayət yoxdursa, deməli bu həbs birmənalı şəkildə siyasi qərardır".

Qeyd edək ki aprelin iyirmi birində Azərbaycan Yüksəliş Partiyasının sədri Anar Əsədli həbs edilib. Nərimanov Rayon Məhkəməsində keçirilən prosesdə Anar Əsədli barəsində 3 aylıq həbs qətimkan tədbiri seçilib. O dələduzluqda təqsirləndirilib və barəsində Cinayət Məcəlləsinin 178-ci (dələduzluq) maddəsi ilə cinayət işi başlayıb. Ümumilkdə Anar Əsədli barəsində 4 şikayətçi var. O, həmin şəxslərdən külli miqdarda pul alıb geri qaytarmamaqda ittiham edilir. Əlavə edək ki, bu işlə əlaqədar Anar Əsədlinin ölkədən çıxışına da qadağa qoyulub.