“İranın Azərbayacana qarşı artan təhdidləri fonunda iki ölkə arasında münasibətlərin pozulmasından sonra bir çox problem də ortaya çıxdı. Azərbaycan iqtidarının İranla bağlı kifayət qədər sərt açıqlamaları yayıldı və bu proses indi də davam edir. Amma görünən odur ki, bəzi hallarda bu məsələlər açıqlama, şüardan o tərəfə keçmir”.
Bunu TNS-ə açıqlamasında Azərbaycan Yüksəliş Partiyasının başqanı Anar Əsədli deyib.
O bildirib ki, illərdir, İran rejiminin məhrumiyyətlərinə, amansız işgəncələrinə, törətdiyi qətllərə baxmayaraq, mübarizələrindən çəkinməyən, hər addımda bizə dəstək olan, ən son Vətən savaşı zamanı canları-qanları bahasına Ermənistana gələn yardımların qarşısını kəsən, ümid yeri gördüyü Azərbaycan Respublikasına pənah gətirən soydaşlarımızın burada onlarla problemi həllini gözləyir.
Anar Əsədlinin sözlərinə görə, onların ən önəmli problemi miqrasiya ilə bağlıdır: “Güneyli soydaşlarımız burada müvəqqəti və ya daimi yaşamaq, işləmək, diplomlarının tanınması ilə əlaqədar ciddi problemlə üzləşirlər. Güneyli soydaşlarımıza heç olmasa, digər xarici ölkələrdən gələn alimlər, həkimlər, sənətçilər, idmançılar və s. qədər imkan yaradılmalı, süni maneələr törədilməməlidir. Təbii ki, milli təhlükəsizlik baxımından problem yaratması ehtimal olunan şəxslər istisnadır”.
Partiya başqanı deyib ki, pafoslu çıxışlar, şüarlar da lazımdır, amma ortaya iş qoyulmasa, bir nəticəyə hasil olmaq mümkün deyil:
“Buna görə, aidiyyəti qurumlara səslənirəm ki, ilk növbədə onların miqrasiya problemini həll etmək üçün səy göstərilsin. Güneyli soydaşlarımızın burada rahat yaşamaları təmin olunsun. Dövlət olaraq, bu kimi məsələlərdə güneyli bacı-qardaşlarımızın dayağı olmalıyıq”,
Anar Əsədli bildirib ki, ölkəmizin dövlət orqanlarının güneyli soydaşlarımızın problemlərinin həlli istiqamətindəki fəaliyyəti Azərbaycan Prezidentinin mövqeyinə, qarşıya qoyduğu vəzifələrə adekvat olmalıdır.
“İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” mövzusunda keçirilən beynəlxalq konfransda demişdi ki, “Biz İrandakı azərbaycanlıların müdafiəsini təmin etmək üçün hər şeyi edəcəyik. Onlar bizim millətin bir parçasıdır”.
Əgər İlham Əliyev güneyli soydaşlarımızı qorumaq üçün “hər şeyi edəcəyik” deyirsə, o zaman sual edirik. Güneyli soydaşlarımızın problemlərinin həllinə biganə yanaşan dövlət orqanlarının rəhbərləri kimə və nəyə xidmət edir? Biz güneyli soydaşlarımıza belə sahib çıxırıq? Azərbaycanda yaşayan güneylilərin problemlərini həll etməliyik ki, onlar amansız molla rejiminin repressiyasına məruz qalmasın, İran hakimiyyətinin cəza aparatının qurbanına çevrilməsin. Bunu həm də dövlətimizin güclü olduğunu, bütün dünyada yaşayan azərbaycanlılara sahib çıxdığını göstərmək üçün etməliyik”, - Partiya başqanı əlavə edib.
