Abşeron rayonun Masazır qəsəbəsində Azərbaycan Yüksəliş Partiyasının rayon təşkilatının təsis yığıncağı keçirilib. Partiya İcra Aparatının rəhbəri Aqil Dadaşzadə tədbiri açaraq, sözü Başqanın Təşkilat işləri üzrə müavini Əlövsət Xalıqverdiyevə verib. Başqan müavini partiyanın təşkilatlanma sahəsində gördüyü işlər, Abşeron Rayon Təşkilatı haqqında qısa məlumat verib.

 

AY Partiya Abşeron Rayon Təşkilatının sədri Şahin Səfərli çıxış edərək, bildirib ki, vətənə xidmət üçün imkan yaranıbsa, addım atmaq lazımdır. O, AY Partiyada aktiv fəaliyyət göstərməkdən məmnun olduğunu bildirib.

 

Partiya Başqanı Anar Əsədli Abşeron torpağının Məhəmməd Əmin Rəsulzadə başda olmaqla, dahi şəxslər yetişdirdiyini diqqətə çatdırıb. O, Abşeronun ölkənin mədəni, siyasi, iqtisadi sahədə önəmli yerinin olduğunu bildirib.

 

Anar Əsədli aktiv siyasətlə məşğul olmağın əhəmiyyətindən danışaraq, deyib ki, insanlarımızın həyatlarına biganə yanaşmaları üçün onları siyasətdən uzaqlaşdırdılar: “Bu gün siyasətə qarışmamağın fəsadlarını çəkirik. Artıq dəyişim dönəminə girmişik. İslahatlar, açılımlar labüddür. İnsanlarımız aktiv siyasətə gəlməlidir".

 

Şəhid İsmayıl Mehdiyevin anası Natəvan Mircıfərova, şəhid Faiq Həsənovun anası Nazilə Həsənova çıxış edərək, şəhid ailələrinə münasibətdən narazılıqlarını bildiriblər.

 

Amil İsmayılov, Mahir Eybalıyev və digər şəxslər söz alaraq, müxtəlif mövzularda fikirlərini bildiriblər. Xüsusilə gənclərin aktiv siyasətə cəlb olunmasının önəminə toxunublar.

Tədbirin sonunda Başqan Anar Əsədlinin “Vicdanın labüd etdiyi savaş” kitabı AY Partiyanın yerli təşkilatının üzvlərinə təqdim olunub.