Azərbaycan Yüksəliş Partiyası Başqanlıq Heyətinin növbəti iclası keçirilib.
İclasda AY Partiya Başqanlıq Heyətinin Türkiyəyə səfəri, Naxçıvan Muxtar Respublikası ilə bağlı proseslər, Azərbaycanın Rusiya sülhməramlılarının nəzarətində olan ərazilərində davamlı şəkildə törədilən təxribatlar, sülh müqaviləsinin imzalanmaması və savaş ehtimalı, partiyanın 21 Azər hərəkatının ildönümü ilə əlaqədar keçirəcəyi tədbir, cari məsələlər barədə müzakirələr aparılıb.
Başqan Anar Əsədli AY Partiya rəhbərliyinin Türkiyə səfərini, keçirilən görüşləri yüksək qiymətləndirib. Qeyd olunub ki, AY Partiya Ankarada səfərdə olduğu 9 gündə 37 görüş və ziyarət gerçəkləşdirib. Bu müddətdə partiya rəhbərliyi Ankarada böyük öndərlər Məhəmməd Əmin Rəsulzadə və Mustafa Kamal Atatürkün məzarlarını ziyarət edib, üç televiziya və qəzetə müsahibə verib. Ümumilikdə 10 partiya ziyarət edilib, iki partiya başqanı, beş millət vəkili ilə görüş keçirilib. Bundan başqa, 5 rəsmi qurum, 2 mətbuat qurumunun redaksiyası, 3 beyin mərkəzi, türk toplumlarını təmsil edən 4 dərnək ziyarət olunub. Bu səfərin əsas məqsədi Azərbaycan və Türkiyənin siyasi institutları arasında əlaqələri daha da dərinləşdirməkdən, gücləndirməkdən, Türkiyənin siyasi partiyalarının təcrübələrini öyrənməkdən, oradakı müsbət tendensiyaları Azərbaycana inteqrasiya etməkdən ibarət olub. Səfərdə nəzərdə tutulmuş məqsədlərə nail olunduğu bildirilib.
Toplantıda Naxçıvanla bağlı müzakirələrə geniş yer verilib. AY Partiya Naxçıvanla bağlı struktur islahatlarını müsbət qiymətləndirib.
İclasda Vətən savaşının bitməsindən iki il ötməsinə baxmayaraq, hələ də Azərbaycan və Ermənistan arasında sülh sazişinin bağlanmaması məsələsinə toxunulub. Bildirilib ki, Azərbaycan tərəfinin cəhdlərinə baxmayaraq, Ermənistan bu məsələdə sabit mövqe sərgiləmir və Rusiya razılaşmanın qarşısını bütün gücü ilə almağa çalışır.
Cari məsələlərin müzakirəsindən sonra Başqanlıq Heyətinin bəzi üzvlərinə partiyanın vəsiqəsi təqdim edilib. İlin sonuncu ayında partiyanın Baş Məclisinin çağırılması haqqında qərar qəbul edilib.