Azərbaycan Yüksəliş Partiyasının Ermənistan silahlı qüvvələrinin sərhəddəki son təxribatları ilə əlaqədar bəyanatı
12 sentyabr 2022-ci il tarixində Ermənistan silahlı qüvvələrinin bölmələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib.
Azərbaycan Ordusunun bu istiqamətdə dislokasiya olunan bölmələri təxribatın qarşısını alıb, Ermənistan silahlı qüvvələrinin atəş nöqtələrinin susdurulması istiqamətində qəti cavab tədbirləri görüb.
Sülh danışıqlarına dair normallaşma prosesini müxtəlif bəhanələrlə ləngidən, beynəlxalq səylərlə aparılan danışıqlarda destruktiv mövqe nümayiş etdirən, üçtərəfli bəyanatlar və əldə edilmiş razılıqlar çərçivəsində öhdəliklərə zidd olaraq, erməni silahlı birləşmələrini Azərbaycan ərazisindən çıxarmayan, Ermənistanda istehsal olunan minaların son zamanlarda Laçın ərazisində yerləşdirilməsi də daxil olmaqla ərazilərin minalanmasını davam etdirən Ermənistana cavabın hərbi yolla verilməsi bu günün geosiyasi reallıqları və şərtləri fonunda qaçılmaz fakta çevrilib.
Azərbaycan Yüksəliş Partiyası hesab edir ki, beynəlxalq havadarlarına güvənərək sülh prosesini hər vəchlə pozmaq və vaxtı uzatmaq xətti tutan Ermənistanın davamlı təxribatlarına qarşı Azərbaycanın sülhə məcburetmə ilə bağlı verdiyi qərarı daxili auditoriyada lüzumsuz mübahisə etmək, bunu hansısa geosiyasi güc mərkəzlərinin bir-birilə apardığı mübarizənin predmetinə çevirmək doğru yanaşma deyil. Hər şeydən əvvəl Azərbaycan Respublikası müstəsna hüququ kimi öz ərazi bütövlüyü və suverenliyini istər siyasi, diplomatik, istərsə də hərbi yola tam surətdə bərpa etməlidir. Bu proses Azərbaycanın milli və strateji maraqları çərçivəsində ölkənin suverenliyi və ərazi bütövlüyünün tam surətdə bərpa olunması başa çatanadək davam etdirilməlidir.
AY Partiya bildirir ki, Ermənistan 10 noyabr 2020-ci il tarixli üçtərəfli bəyanatla üzərinə götürdüyü öhdəlikləri yerinə yetirmir. İndiyədək erməni silahlı birləşmələri Azərbaycanın suveren ərazisindən çıxarılmayıb. Bu müddətdə kommunikasiya xətləri açılmayıb, sərhədlər müəyyənləşməyib, sülh müqaviləsinin mətni belə hazırlanmayıb.
Hər iki tərəfdə itkilərlə müşayiət olunan hərbi toqquşma bir daha Ermənistanın üçtərəfli razılaşmanı kobud şəkildə pozduğunu, eyni zamanda iki dövlət arasında münasibətlərin normallaşması istiqamətində səylərə xələl gətirdiyini nümayiş etdirir.
Bu, həmçinin Ermənistanın beynəlxalq vasitəçilərin səylərinə hörmətsizliyinin də bariz göstəricisidir.
Azərbaycan dövləti 2020-ci ildə baş verən və tarixi zəfərimizlə yekunlaşan 44 günlük savaşdan bu yana keçən iki ildə xarici siyasətdə tutduğu konstruktiv, barışcıl mövqeyi, müxtəlif səpkili təxribatların hələ də davam etdiyi bir müddətdə nümayiş etdirdiyi təmkinli siyasi duruşu və uzunmüddətli sülhə sadiq olduğunu bu il Avropa İttifaqı Şurasının Prezidenti Şarl Mişelin vasitəçiliyi ilə təşkil olunan üç görüşdə iştirak etməsilə bir daha sübut edib.
Ermənistanın əl atdığı müxtəlif səpkili təxribatlarla beynəlxalq ictimaiyyətə hər fürsətdə Azərbaycanı sülhə qarşı olan bir dövlət kimi təqdim etməyə çalışması ucuz siyasi şoudan başqa bir şey deyil. Məğlub ölkə statusunu heç cür həzm edə bilməyən Ermənistan hakim dairələri və cəmiyyəti hətta Brüssel görüşlərinin nəticələrini də şübhə altına salır və əməkdaşlıq platformasını dağıtmaqla məşğuldur.
Ən son 31 avqust görüşündə iki ölkənin xarici işlər nazirlərinə sülh sazişinin mətni üzərində işləmək tapşırılmışdı. Lakin görünən odur ki, xarici dövlətlərin əlində oyuncağa çevrilən Ermənistan, hətta bu şərtlər və reallıqlar altında imzalanacaq böyük sülh müqaviləsinə hazır ola bilmir. Qlobal güc mərkəzlərinin bir-birilə didişmə məntəqəsinə çevrilmiş Ermənistanı idarə edən siyasi hakimiyyətin sülh danışıqları prosesini uzatması Azərbaycanın da səbrini sınağa çəkir və bu səbəbdən prosesi durduğu yerdən tərpətmək üçün gücdən istifadə zərurətə çevrilir.
Hesab edirik ki, Azərbaycan-Ermənistan sərhədi boyu baş verən insidentin bütün məsuliyyəti qonşu dövlətin torpaqlarından qanunsuz silahlı birləşmələrini çıxarmayan Ermənistanın siyasi və hərbi rəhbərliyinin üzərindədir.
Hərbi-siyasi müttəfiqimiz qardaş Türkiyə Cümhuriyyəti ilə daim həm diplomatik, həm də hərbi məsələlərdə koordinasiya içində olan, ərazilərinin təhlükəsizliyi, sərhədlərinin bütövlüyünün təmin edilməsi üçün Azərbaycan Respublikası Müdafiə Nazirliyi tərəfindən atılan bütün müvafiq tədbirləri təqdir etməklə, qeyd edirik ki, dövlətin bununla əlaqədar ortaya qoyduğu siyasi iradə və qətiyyəti dəstəkləyirik.
Ermənistan hansısa siyasi məqsədinə ümid bəslədiyi təxribatları dayandırmalı, 2020-ci il 10 noyabr tarixli üçtərəfli bəyannamənin bütün bəndlərinə qeyd-şərtsiz əməl etməli, 44 günlük savaşdan sonrakı müddətdə sülh danışıqlarının keçirildiyi bütün beynəlxalq platformalarda əldə olunan razılıqlara sadiq qalmalı, o cümlədən diqqətini və bütün mümkün səylərini Azərbaycanla sülh danışıqları və əməkdaşlığa yönəltməlir.
Azərbaycanla düşmənçilik edən bir qonşusu onunla sülh müqaviləsi bağlamaq istəmirsə, o zaman Azərbaycan, təbii olaraq, öz təhlükəsizliyi üçün həmin düşmən qonşu ilə arasında sərhədboyu bufer zona yaratmağa məcburdur.
Baş vermiş hərbi toqquşma ilə əlaqədar bölgədə ciddi maraqları olan beynəlxalq güc mərkəzlərinin hadisə ilə bağlı verdikləri bəyanat və açıqlamalarda müəyyən qərəzli yanaşmalardan dolayı təəssüf hissi keçirməklə, AY Partiya bəyan edir ki, dünyada qlobal siyasətin müəyyənləşməsində rol alan böyük dövlətlər Cənubi Qafqazla bağlı siyasətlərini elə ehtiyatla və həssaslıqla qurmalıdırlar ki, regionun uzun illərdir, hava-su qədər ehtiyacı olduğu uzunmüddətli sülhün, barışın və birgəyaşayışın təmin olunmasına, bütün növ nəqliyyat və kommunikasiya xətlərinin işə düşməsi, bölgədə gerçək iqtisadi-ticarət, o cümlədən mədəni əlaqələrin dərinləşdirilməsi və inkişafına töhfə vermiş olsunlar. Əks halda baş verəcək hər cür neqativ proseslərin nəticələrindən daim təxribatlara müraciət edən və pozuculuqla məşğul olan Ermənistan dövləti məsuliyyət daşıyacaq.
Rusiya da, ABŞ da, Avropa da anlamalıdır ki, Cənubi Qafqazın əsas dövləti Azərbaycandır. Bu münaqişədə Azərbaycanın maraqları nəzərə alınmalıdır. Azərbaycanın maraqları haqlı maraqlardır, bizim torpqlarımız işğal olunub, Azərbaycan əslində BMT-nin müvafiq qətnamələrini icra edir. Bizim Ermənistana ərazi iddiamız yoxdur. Azərbaycanın ərazi bütövlüyünü tanıyan bütün dövlətlər Azərbaycanın apardığı əməliyyatlara hörmətlə yanaşmalıdır. Əks halda bəzi ölkələrin səsləndirdiyi bəyanatlar ərazi bütövlüyümüzə təhdid kimi dəyərləndiriləcək.
Biz nə müharibə, nə qan istəyirik. Amma indi sülhə gedən yol savaşdan keçir. Azərbaycan Ordusunun apardığı əməliyyatların tək bir məqsədi var - Qafqazda sülhü bərpa etmək. Qafqazda sülh Azərbaycan Ordusundan asılıdır.
Allah bütün şəhidlərimizə rəhmət eləsin!
Tanrı Azərbaycan Ordusunu qorusun!