Azərbaycan Yüksəliş Partiyasının Gürcüstan Demokratik Respublikasının Sovet Rusiyası tərəfindən işğalının 100-cü ildönümü ilə əlaqədar anım mesajı
25 Fevral 1921-ci ildə Rusiyanın Qırmızı Ordusu Tiflisi ələ keçirdi, Gürcüstanda azad seçkilərlə seçilən hökuməti devirdi və bu da beynəlxalq hüquq subyektinin - Gürcüstan Demokratik Respublikasının işğalına səbəb oldu.
Bu hadisədən təxminən 10 ay əvvəl, 28 aprel 1920-ci ildə eyni aqibəti Azərbaycan Xalq Cümhuriyyəti yaşadı. Rus çarizminin xələfi olan bolşevik Rusiyası Güney Qafqazda yaranan demokratik respublikaların varlığına imkan verməmək üçün özünün qanlı üzünü daha sərt formada göstərdi.
Buna baxmayaraq, 1991-ci ildən etibarən bir çox xalq kimi, Gürcüstan da, Azərbaycan da müstəqillik qazandı istiqlaliyyətə qovuşdu. Sovet İmperiyası isə tarixin zibilliyinə göndərildi.
Gürcüstan Parlamentinin 21 iyul 2010-cu il tarixli qərarı ilə 25 fevral Sovet İşğal Günü elan edildi.
Yüz minlərlə işğal qurbanının xatirəsinə həmin gün Gürcüstanın hər yerində dövlət bayraqları endirilir.
AY Partiya Gürcüstan xalqı ilə həmrəyliyini bildirir, işğala qarşı dirəniş göstərmiş, Gürcüstanın müstəqilliyi uğrunda canından keçmiş insanların xatirəsini yad edir, Gürcüstanın yenidən əldə etdiyi müstəqilliyinin daimi olmasını diləyir, tezliklər ərazi bütövlüyünü bərpa edəcəyinə inandığını bildirir.