28 Mart 1991-ci ildə Türkmənlərə qarşı Altunköprü qırğını olaraq bilinən faciədən 32 il ötür. Bu qırğında 100-dən çox Türkmən Baas rejimi ordusu tərəfindən vəhşicəsinə öldürüldü.

Qırğının baş verdiyi Altunköprü Kərkükün Dibis mahalının bir alt bölgəsidir və son dərəcə strateji bir yerə sahibdir. Ramazanda oruclu olmalarına baxmayaraq, uşaq və yaşlı demədən Səddam rejiminin əsgərləri tərəfindən evlərindən zorla çıxarılan və naməlum istiqamətə aparılan türkmənlərdən yalnız bir neçə gün sonra xəbər alına bildi. Məlum oldu ki, onların hamısını güllələyib və ümumi məzarda basdırıblar. Öldürülənlərin heç bir cinayət və günahı yox idi, öldürülmələrinə tək səbəb onların Türk olmaları idi.

Altunköprü qırğını insanlıq tarixinə qaranlıq ləkə kimi düşsə də, bir sıra beynəlxalq qurumlar tərəfindən lazımi qiymətini almadı. Türkmənlərə qarşı edilən bu qəddar qətl heç vaxt unudulmayacaq və insanlıq üçün bu cinayət tarixdə qara ləkə olaraq qalacaq.

AY Partiya Altunköprü qətliamında qətlə yetirilən hər bir soydaşımızın əziz xatirəsini dərin hüzn və ehtiramla yad edir, türkmənlərə qarşı törədilən bu cinayəti heç vaxt unutmayacağımızı bəyan edir.