Media təmsilçiləri “Siyasi partiyalar haqqında” qanunun qəbulu ilə bağlı suallar ünvanlayırlar.
Bu haqda danışmağı artıq doğru hesab etməsəm də, bir neçə cümlə ilə ümumi baxışımı ifadə edim.

İlk olaraq bildirim ki, Azərbaycan Yüksəliş Partiyası qanuna əlavə və dəyişiklikliyə dair təkliflərlə çıxış edib, təkliflərini Milli Məclisə göndərsə də, biz parlamentdə keçirilən dinləmələrə dəvət almadıq. Bu fakt hansı qanunun qəbul edilib-edilməməsindən asılı olmayaraq, ölkənin yeni yaranmasına baxmayaraq, ən güclü siyasi təşkilatına münasibətin bir göstəricisi idi.

“Siyasi partiyalar haqqında” məntiqi açıqlaması olmayan bir qanun qəbul edilib. Avropaya inteqrasiya, Rusiya və sovetin kiflənmiş, özünü doğrultmayan, azad sözü və fikri qadağan etmək ya da sərt şəkildə məhdudlaşdırmaq kimi üsullardan uzaqlaşmaq dövründə olduğumuzu düşünərkən bu qanunun qəbulu təəssüf hissi yaratdı.

Sovet dönəmində hər il keçmiş illə bağlı ailəni və əhalini yoxlamaq məqsədi ilə "domovaya knijka" tərtib edirdilər. Vaxtaşırı o dəftərçə yoxlanılırdı. İndi Azərbaycan hökuməti siyasi partiyaları həmin "domovaya knijkaya" salaraq, siyasi cəhətdən həm məhdudlaşdırır, həm də yumşaq dillə desək, təhdid edir. Heç şübhəsiz əziz-xələf "partiyalar" bu təftişdən uzaq saxlanılacaq.

Özünü "yaxşı apamayan" partiyalara isə ildə bir dəfə təftiş gələcək. "Revizor" sistemini siyasi sistemə gətirmək hüquqa, azad sözə və fikrə həqarətdir.

AY Partiya 5000-dən çox üzvlərinin reyestrini tərtib və təqdim edəcək. Bizim üzv sayı problemimiz yoxdur. Lakin belə bir mühitdə siyasi fəaliyyət göstərmək çox ağır olacaq ki, bu da siyasi institutların zəifləməsinə gətirib çıxaracaq.

Siyasi müxalifəti olmayan və ya sıxılmış, əzilmiş müxalifətə sahib cəmiyyət isə inkişaf edə bilməz.

Anar Əsədli

Azərbaycan Yüksəliş Partiyası Başqanı