Azərbaycanda analoqu olmayan karantin rejiminin sərtləşdirilməsi davam edir. Lakin karantin tədbirlərinin sərtliyi bir tərəfə, bir çox hallarda mənasızlığı, hətta sağlamlığa zərərləri xalqımızı narahat etməyə bilməz. 

COVID-19 pandemiyası çıxandan bəri bir sıra alimlər bu virusla birlikdə yaşamağı öyrənməli olduğumuzu, virusa qarşı aparılan mübarizəni doğru qurmaq gərəkdiyini dəfələrlə dilə gətirsələr də, Azərbaycanın rəsmi səhiyyə sistemi bu xəbərdarlıqlara əhəmiyyət verməyərək öz yarıtmaz fəaliyyətinə davam edir.

İndi yaz gəlir, havalar istiləşir, bütün canlı aləm qış yuxusundan oyanır, amma bizi, xalqı hələ də karantin hekayələri ilə yuxuya vermək istəyirlər. Novuz Bayramı günlərində ictimai nəqliyyatın fəaliyyətini tamamilə dayandırmağın nə məntiqlə, nə sağlamlıqla, nə də dünya təcrübəsi ilə əlaqəsi var. On minlərlə günəmuzd işçilərin hər gün taksi ilə işə gedib gəlməsinə və ya kiçik və orta biznes sahiblərinin işçilərinə yol pulu xərclərində artıma kompensasiya verməsinə imkanları olmadığı bir vaxtda ictimai nəqlliyyatı niyə və hansı məqsədlə bağlayrısınız? Nə vaxta qədər virusla deyil, zəhmətkeşlərlə mübarizə aparacaqsınız? İnsanların qazandıqları qəpik-quruşu da çoxmu görürsünüz ki, səyahət imkanlarını daraldırsınız?

AY Partiya rəhbərliyi olaraq hesab edirik ki, Novruz Bayramı günlərində maska taxmaq, sosial məsafəni saxlamaq, əl təması etməmək, dezinfeksiya məhlullarından istifadə etmək kimi standart tədbirlərin xaricində başqa heç bir qadağalara və məhdudiyyətlərə getmək lazım deyildi. Bu minvalla Səhiyyə Nazirliyimizi və Nazirlər Kabineti yanında Operativ Qərargah rəsmilərini Bayram günlərində ictimai nəqliyyatın fəaliyyəti ilə əlaqədar aldıqları qərarı ləğv etməyə çağırır, bundan sonra da xalqımızın mənafeyini hər bir məsələdən üstün tutacağımızı bəyan edirik.