Azərbaycan Yüksəliş Partiyasının Vətəndaş və İnkişaf Partiyasının sədri Əli Əliyevin Baş Prokurorluğa çağırılması ilə əlaqədar bəyanatı
Xəbər verildiyi kimi, bu il sentyabrın 22-də Vətəndaş və İnkişaf (VİP) Partiyasının sədri Əli Əliyev internet televiziyalarında və sosial şəbəkələrdəki çıxışlarına görə Baş Prokurorluğa çağrılıb, ona bu barədə xəbərdarlıq edilib.
Yayılan rəsmi məlumatda buna Əli Əliyevin çıxışlarında müxtəlif şəxslər barəsində böhtan və təhqir xarakterli ifadələr istifadə etməsi, vətəndaşlara qarşı zorakılıq etməyə yönələn çağırışlar etməsi, internet informasiya resurslarında qanunvericiliklə qadağan olunmuş məlumatlar yerləşdirməsi, həmçinin pandemiyaya qarşı mübarizə sahəsində dövlət orqanları tərəfindən həyata keçirilən məqsədyönlü tədbirlərin üzərinə kölgə salan, sanitariya-gigiyena və karantin rejimlərinin pozulmasına yönələn ifadələrə yol verməsi səbəb kimi göstərilib.
Azərbaycan Yüksəliş Partiyası bəyan edir ki, tənqidi çıxışlara görə siyasi partiya rəhbərlərinin və üzvlərinin hüquq-mühafizə orqanları tərəfindən təzyiqlərə məruz qalması cəmiyyətdə xoş olmayan mənzərə yaradır, 44 günlük Vətən Müharibəsi zamanı yaranmış Milli Birliyimizə, dialoq çağırışlarına zərbə vurur. Bu, eyni zamanda beynəlxalq təşkilatların ölkəmizə demokratiya sahəsində mövcud olan çatışmazlıqlarla bağlı təzyiqlərinin artmasına gətirib çıxara bilər.
AY Partiya gərginliyə səbəb olacaq bu kimi hallara yol verilməməsinin, hər kəsin, o cümlədən siyasi partiya liderlərinin fikirlərinin azad şəkildə ifadə etməsinə şərait yaradılmasının ölkəmizin demokratikləşməsi istiqamətində önəmli addım olacağını bildirir, hesab edir ki, partiya sədrinin bu formada Baş Prokurorluğa çağırılması müsbət hal deyil, rəsmi qurumlar siyasi liderlərlə etik çərçivədə rəftar etməlidir.