Milli memarlıq ənənələrini, həmçinin Avropa klassisizmini Azərbaycan memarlığına gətirmiş Zivər bəy Əhmədbəyov 1873-cü ildə Şamaxıda anadan olub, Peterburq İnşaat Mühəndisləri İnstitutunu bitirəndən sonra - 1910-cu ildən Bakıda yaşayıb.

 

Cümhuriyyət elan edildikdən sonra Bakı şəhərinin baş memarı təyin olunan Zivər bəy Şamaxıda Cümə məscidi, İmam məscidi, Bakıda Təzə Pir məscidi, Göyçayda Əbülfəzlil Əbbas məscidi, Əmircanda Murtuza Muxtarov məscidi, ölkədə, Vladiqafqazda bir sıra yaşayış, məişət binalarının layihələrinin müəllifidir.

Memarın tikdiyi “Murtuza Muxtarov” məscidi Şərq memarlığının ən yaxşı incilərindən biri kimi UNESCO-nun tarixi abidələr siyahısına salınaraq qorunur.

O, şəhərin daşnaklar və eser-menşeviklərdən ibarət “Sentrokaspi diktaturası”ndan azad olunması (1918, 15 sentyabr) zamanı şəhid olmuş azərbaycanlı və türk əsgərlərinin xatirəsini əbədiləşdirmək üçün Çəmbərəkənd qəbiristanlığında (indiki Şəhidlər Xiyabanı) ucaldılacaq abidə kompleksinin layihəsini hazırlayıb. Altıbucaqlı türbə görünüşündə olan həmin layihədə orta əsr Azərbaycan memarlıq incilərindən məharətlə istifadə olunub. Azərbaycanın işğalı ilə barışa bilməyən memar sovet hökumətinin təzyiqlərinə dözməyərək 1925-ci ildə intihar edib.

Azərbaycan Yüksəliş Partiyası Qərbi Avropa və Şərq memarlıq ənənələrini böyük məharətlə birləşdirərək, nəhəng əsərlər ərsəyə gətirmiş Zivər bəy Əhmədbəyovu sayğı ilə yad edir.