Rusiya Dövlət Dumasının deputatı Konstantin Zatulin dünən Qarabağ İctimai Televiziyasında həddini aşan, başqa sözlə Azərbaycanı təhdid edən açıqlama ilə çıxış edib.O bildirib ki, Azərbaycan davamlı sülhə can atmadığını göstərir və rusların bölgəyə gəlişi qısa müddətli deyil. “Azərbaycan Türkiyə ilə birləşib Ermənistana siyasi təzyiq göstərir. Hamı keçmişdən dərs almalıdır, Rusiyanı dişinə vurub, onun reaksiyasının nə olduğunu bilməyə can atmamamlıdır. Bunu hərdən arzu edənlər cavabımızın nə olduğunu artıq görüblər”,- deyə deputat bildirib.
Məsələ ilə bağlı bizimyol.info-ya açıqlama verən Azərbaycan Yüksəliş Partiyasının Başqanı Anar Əsədli bildirib ki, Rusiya yetkililərinin Azərbaycana qarşı səsləndirdiyi şantaj və hədə dolu çıxışlar heç şübhəsiz, Putinin istəyi və razılığı, hətta cəsarətlə irəli gedib söyləmək olar ki, birbaşa göstərişi ilə reallaşır. “Yoxsa, bir yüksək rütbəli məmurun nə həddinədir ki, Azərbaycan və Türkiyəyə "dərs keçir". Azərbaycan yetkililəri isə bu şantaj qarşısında susqunluq sərgiləyir”.
O qeyd edib ki, əlbəttə, Rusiyanın bu tipli çıxışlara ehtiyac duyması təbiidir. “Bir tərəfdən Ermənistana məhəlləsayağı “abilik" edir, yəni "bax, səni döymək istəyən qarşısında məni bulur", eyni zamanda onlara "mənsiz səni yeyərlər" mesajı verir. Digər tərəfdən Rusiya artıq anlamağa başlayır ki, onun ziddiyyətli geosiyasi mövqeyi öz əleyhinə işləyir. Putinin Azərbaycanın ərazi bütövlüyünü tanıdığını, Qarabağın Azərbaycan ərazisi olduğunu, hətta KTMT-nin müdaxiləsi ilə bağlı suala cavab olaraq, Azərbaycanın suverenliyi baxımından bunun mümkünsüz olduğunu bildirməsi bir dövlətin rəsmi səviyyədə olan mövqeyidir. Bütün baş verən ayısayağı təhdidlərin qarşısında Azərbaycan və Türkiyə region üçün cızdıqları planı addım-addım həyata keçirməyə çalışır”,- deyə AY Partiya Başqanı bildirib.
Anar Əsədlinin sözlərinə görə, Azərbaycan Respublikası ilə Türkiyə Respublikası arasında bağlanmış hərbi sahədə əməkdaşlıq haqqında sazişə əsasən, Laçın rayonunda birgə döyüş atışlı taktiki təlim keçirilməsi, təlimlərin məhz sülhməramlıların qorumağa məsul olduğu, lakin öz missiyasını unutduğu Laçın bölgəsində təşkili “hər an buranı tərk edə bilərsiz” mesajını ifadə edirdi: “Rüstəm Muradovun təyinatına qəfil xitam verilməsi və əsirlərin mübadiləsi zamanı Azərbaycanlı əsirin İrəvandan təhvil alınması fonunda bunu deyə bilərik: İncə təhlil edərkən üzə çıxır ki, bölgədəki baş verən qarışıqlıq Azərbaycanın başladığı siyasi kursa uyğundur. Bəli, Azərbaycan tərəfi tam dərk edir ki, Rüstəm Muradovun dəyişilməsi el diliylə desək, “Əlinin papağını Vəlinin başına qoymaqdır”. Adların dəyişilməsi Rusiyanın xislətini dəyişə bilməz. Sadəcə, Kreml bərbad imicini bu üsulla bərpa etməyə çalışır”.
Azərbaycanlı əsirin İrəvandan götürülməsinə gəlincə, Anar Əsədli hesab edir ki, burada iki məqam var: 1. Laçın ərazisində Türkiyənin təlimlər keçirməsi fonunda Ankaranın mövqeyini gücləndirməsi və əsirlərin artıq Qarabağda deyil, Ermənistan ərazisində saxlanılması. 2. Rusiyanın bu münaqişəni etnik münaqişə zəminindən ayıraraq, Ermənistan-Azərbaycan münaqişəsi kimi qəbul etdiyini etiraf etməsi. “Bu mesajların mahiyyətinin nə olmasından asılı olmayaraq, yeganə həqiqət odur ki, Azərbaycan öz hərbi qüdrəti və Türkiyənin mənəvi dəstəyi ilə ərazi bütövlüyünün böyük hissəsini bərpa edib, yaxın zamanda suverenliyimizi geri qalan ərazilərdə də təmin etməkdə qərarlıdır. Bölgədə təlimlərin belə bir vaxtda keçirilməsi də göstərir ki, bu xəmir hələ çox su aparacaq. Regionun siyasi gündəmində baş verən dəyişikliklər də bunun əyani sübutudur”,- AY Partiya Başqanı vurğulayıb.
https://www.bizimyol.info/az/news/361156.html?fbclid=IwAR09fMa0Ovh70aaVyWtHvJZniyY-f6zMijObFhsGaG-C2SNyuhcv0KVLCG4
