Azərbaycan kino sənətinin istedadlı nümayəndəsi, tanınmış kino aktyoru və rejissor Ceyhun Mirzəyevin doğum günüdür.

Ceyhun Cəmil oğlu Mirzəyev 9 aprel 1946-cı il tarixində anadan olub. 1969-cu ildə hazırkı Azərbaycan Dövlət Mədəniyyət və İncəsənət Universitetinin rejissorluq ixtisası üzrə bitirib.
Ömrünün otuz altı ilini kinoya həsr edən sənətkarın filmə ilk addımı on bir yaşındaykən "Görüş" filmində olub. Yaddaşlarda isə on iki yaşında çəkildiyi "Ögey ana" filmindəki İsmayıl obrazı ilə daha çox qalıb.

C.Mirzayev eyni zamanda "Mozalan" satirik kinojurnalının bədii rəhbəri, rejissor kimi süjetlərin də müəllifi olub.

Rejissoru olduğu, eyni zamanda aktyor kimi də iştirak etdiyi "Fəryad"filmi isə onun şah əsəri hesab olunur. Filmdə canlandırdığı obrazın ruhsal ağırlığı onun həyatla çox erkən vidalaşmasına səbəb olub.

Peşəkar rejissor və aktyor Ceyhun Mirzəyev 5 mart 1993-cü il tarixində dünyasını dəyişib.

Azərbaycan Yüksəliş Partiyası istedadlı sənətkar Ceyhun Mirzəyevin xatirəsini dərin sayğı ilə yad edir.