İranın ölkəmizə qarşı təhdidləri ilə əlaqədar Azərbaycan Yüksəliş Partiyasının bəyanatı 

 

Azərbaycan torpaqlarının 20 faizinin qəsb olunmasında xüsusi rolu olan, Qarabağ və ətraf rayonların 30 ilə yaxın erməni işğalı altında qalmasından girəvəçilliklə yararlanan, özünü guya İslam Respublikası hesab edən İran Azərbaycanın Müzəffər Ordusunun torpaqlarımızın əksər hissəsini azad etdikdən sonra öz düşmənçilik mövqeyini daha açıq biruzə verməyə başlayıb.

 

Azərbaycan Yüksəliş Partiyası olaraq, 38 milyon soydaşımızın da yaşadığı "müsəlman təəssübkeşi" İranın xristian Ermənistana hərtərəfli yardımı fonunda ölkəmizə qarşı təhdid xarakterli hərəkətlərini kəskin şəkildə qınayırıq. 

 

Hesab edirik ki, “cəllad prokuror” ləqəbi ilə tanınan İranın yeni prezidenti Rəisinin hakimiyyətə gəldiyi gündən Türk düşməni olduğunu nümayişkaranə şəkildə göstərməsi, İranın ali dini rəhbəri Xameneyinin qorxaqlara xas təhdidləri və molla rejiminin xarici işlər naziri Abdollahianın gülünc hədələri Azərbaycanı müstəqil xarici və daxili siyasətindən sapdıra bilməz.

 

Tələb edirik ki, İranın ölkəmizə yönəlik düşmən mövqeyinə cavab olaraq, bu dövlətlə bağlı siyasətimizə yenidən baxılsın. İranın Azərbaycanda səfirliyi fəaliyyət gəstərdiyindən əlavə olaraq mövcud olan İran konsulluq şöbəsi və dini nümayəndəliyi ləğv edilsin. Beynəlxalq arenada Ermənistanın cəfakeş dayağı olan İran İslam Respublikasından müstəqilliyimizə və ərazi bütövlüyümüzə yönəlik təhdid xarakterli bəyanatlara adekvat cavab verilsin.

Hesab edirik ki, İranın əndazəni aşmasına siyasi, hüquqi və digər müstəvilərdə cavab vermək üçün ölkəmizin yetərincə gücü var. İran İslam Respublikası Azərbaycan dövlətinə qarşı şantaj və hədə-qorxu siyasətinə son qoymalıdır.