İrana məxsus hərbi təyyarənin dövlət sərhədi boyunca həyata keçirdiyi uçuş ölkəmizin suverenliyinə, təhlükəsizliyinə qarşı təhdiddir. Belə təxribat xarakterli hərəkətlər İran rejiminin gerçək mahiyyətini ortaya qoyur. Bu, təsadüfi deyil, əksinə planlı şəkildə həyata keçirilir. İran ötən il də Azərbaycan sərhədləri yaxınlığında genişmiqyaslı hərbi təlimlər keçirmişdi.

İranın Azərbaycandakı səfirinə Xarici İşlər Nazirliyinin müvafiq etiraz notası təqdim etməsini doğru hesab edir, bildirmək istəyirəm ki, bu ölkənin müstəqilliyimizə və ərazi bütövlüyümüzə yönəlik təhdid xarakterli hərəkətlərinə adekvat cavab verilməlidir ki, İran rejimi Azərbaycan dövlətinə qarşı şantaj və hədə-qorxu siyasətinə son qoysun.

İranın əndazəni aşmasına siyasi, hüquqi və digər müstəvilərdə cavab vermək üçün siyasi institutlar də aktivləşməlidir. Unudulmamalıdır ki, Azərbaycan torpaqlarının 20 faizinin qəsb olunmasında xüsusi rolu olan, Qarabağ və ətraf rayonların 30 ilə yaxın erməni işğalı altında qalmasından girəvəçilliklə yararlanan, özünü guya İslam Respublikası hesab edən İran Azərbaycan Ordusunun torpaqlarımızın əksər hissəsini işğaldan azad etdikdən sonra öz düşmənçilik mövqeyini daha açıq və aydın biruzə verməyə başlayıb.

Səfirliyimizdə törədilən terror aktı zamanı da xüsusi vurğuladım ki, ölkənin ictimai-siyasi təşkilatları bu olayı gündəmdə saxlamalıdır. Çünki təhdid, şantaj, terror və yalan İran rejiminin tam mahiyyətidir.

Bu baxımdan bir daha Azərbaycandakı bütün siyasi təşkilatlara, ictimai birliklərə müraciət edərək, onları İranın beynəxlaq siyasi təşkilatlar tərəfindən qınanılmasına və müvafiq sanksiyaların qəbul edilməsinə nail olana qədər aktiv fəaliyyət göstərməyə çağırıram.

Anar Əsədli
AY Partiya Başqanı