“Azərbaycanın hələlik öz təşəbbüsü ilə Laçın yolu üzərində, başqa sözlə Ermənistanla giriş-çıxış qapısına sərhəd-gömrük keçid məntəqəsi postu qurmasından söhbət getmir. Haqqında söz-söhbəti gəzən bu müştərək mini-postu Rusiya Federasiyası Sülhməramlı Kontingenti qurur, ancaq Azərbaycanın əsaslı və təkidli tələbləri əsasında…”
Bu fikirləri Editor.az-a açıqlamasında Azərbaycan Yüksəliş Partiyasının Başqanı Anar Əsədli deyib.
Onun sözlərinə görə, iki ildir müharibə bitsə Azərbaycanla Ermənistan arasında sülh müqaviləsinin bağlanması dalana dirənib:
“Bu, öz-özlüyündə Laçın yolu və yaxud o istiqamətdən Ermənistanla giriş-çıxış qapısı ilə bağlı məsələləri də həlledilməmiş saxlayıb. Hazırda şərti adı “Laçın dəhlizi” olan bu yolun aqibəti necə olacaq bəlli deyil. Nəticədə biz müşahidə edirik ki, rus sülhməramlılarının arxasında gizlənən revanşist erməni separatçıları öz pis niyyətlərindən əl çəkməyərək yenə də bu yoldan humanitar, sosial-iqtisadi məqsədlər üçün deyil, daha çox hərbi-cinayətkar, terror məqsədləri üçün istifadə etməyə başlayıblar. Ən son ərazimizdə aşkar edilən yeni mina sahələri buna sübutdur. Ardınca bu yaxınlarda İrandan Xankəndiyə keçən bir qrup təxribatçı barədə faktların üzə çıxması bardağı daşıran son damla oldu. Dəfələrlə Azərbaycan dövlət rəhbərliyi və Müdafiə Nazirliyi xəbərdarlıq etsə də ermənilər onlara rus sülhməramlılarının yaratdığı münbit zəmindən məharətlə istifadə etməklə bölgədə növbəti təxribatlar üçün zəmin hazırlayırlar. Şübhə etmirik ki, iki ildir Qarabağda fəaliyyət göstərən Türkiyə-Rusiya Birgə Monitorinq Mərkəzinin əlində bu kimi kəşfiyyat faktları yetərincədir və müvafiq dairələr baş verənlərdən məlumatlıdırlar. Biz əvvəldən belə hesab edirik ki, suveren bir ölkənin sərhəd qapıları onun öz nəzarətində olmalıdır və yad bir ölkənin ordu birliklərinin Azərbaycana aid qapıya, yola nəzarəti bütün hallarda yolverilməzdir və suverenliyə birbaşa təhdid yaradır. Azərbaycan Sərhəd Qoşunları, Azərbaycan Gömrük Komitəsi Laçın sərhəd-gömrük keçid məntəqəsini qurmalı, oradakı istər mülki, istər nəqliyyatın hərəkətinə nəzarət etməlidir. Azərbaycanın öz suveren ərazilərinə kimin və ya nəyin girib-çıxdığını bilməsi onun müstəsna hüququdur və burada hər hansı ölkənin ordu komandanlığının maneələr yaratması bütün hallarda doğru görüntü yaratmır. Azərbaycan təcili surətdə ərazisində yaşayan erməni etnik kimliyi daşıyan adamların dəqiq siyahısının çıxarılmasına nail olmalıdır. Ölkəmizə giriş-çıxış edənlərin şəxsiyyəti ilə bağlı məlumatlar Azərbaycan hüquq-mühafizə orqanlarında da olmalıdır”.
Anar Əsədli qeyd edib ki, rəsmi Bakı sırf “Laçın dəhlizi” ilə bağlı cəmiyyətdən ciddi haqlı təpkilərlə qarşı-qarşıya idi:
“Dəhlizdən qanunsuz daşımaların bu şəkildə nümayişkəranə formada həyata keçirilməsinə rəsmi Bakının axıra qədər dözəcəyi inandırıcı deyildi. Müşahidə elədiyimiz bir nüansı da qeyd edək. Əlbəttə, bölgədə hərbi-siyasi vəziyyət çox mürəkkəbdir. Ukraynada ciddi mənada yaralanmış rus ayısından hər cür avantürist davranışlar gözləmək olar. Ona görə ehtiyatlı olmaqda fayda var. Dəfələrlə hiss etmişik ki, rəsmi Bakı rus sülhməramlılarının müvəqqəti nəzarəti altında olan suveren ərazilərimizdə onların missiyalarından kənar davranışları barədə çeşid-çeşid dəqiq kəşfiyyat məlumatları, kompromatları topladıqdan sonra bu cür kəskin tələblər qoya bilirlər. Rusları bu mənada, şahmat dililə desək, pat vəziyyətinə saldıqdan sonra, onlarla müəyyən məsələlərdə razılığın əldə olunması üçün fürsətlər yaranır. Ən son dəhlizdən qanunsuz daşımaların qarşısının alınması tələbini sülhməramlıların qarşısında qaldıranda, onlar, sülhməramlıların komandanı Volkovun məlum müsahibəsində dediyi kimi, “texniki imkanlarımız yoxdur” bəhanəsini irəli sürdülər. Belə bir cavab rəsmi Bakıya imkan yaratdı təklif irəli sürsün ki, həmin “texniki imkanı” birlikdə ərsəyə gətirib mini-post qura bilərik. Ruslar da başqa çıxış yolu görməyib buna gediblər görünür. Əslində, biz inanmırıq ki, bu mini-post qurulsa oradan qanunsuz daşımaların qarşısı alınacaq. Məsələnin ən pis tərəfi odur ki, Rusiya sülhməramlı kontingenti bu hadisədən özləri üçün yaxşı piar hazırlayacaq, guya hansısa nəticələrin əldə olunması barədə müsbət rəy yaratmağa cəhd edəcək. Digər yandan, Azərbaycan tərəfinin, hətta rusların əli ilə Laçın qapısında mini-post qurması yeni presedent yaratması baxımından əhəmiyyətlidir. Ermənilərə bir daha aydın oldu ki, torpağın sahibi var və orada hələlik hansı ölkənin hərbi kontingentinin müvəqqəti yerləşdirilməsindən asılı olmayaraq, son söz Azərbaycana məxsusdur və tədricən Qarabağın hər tərəfində yuridiksiyamız bərpa olunacaq.
İkincisi, Azərbaycan qurulması planlaşdırılan mini-post vasitəsilə rusların “texniki imkanlarımız yoxdur” bəhanəsini də əlindən almış oldu. İndən belə hər hansı qanunsuz daşımalar fonunda, ruslar “yoxlamaq iqtidarında deyilik” deyə bilməyəcək və bu hadisələrin növbəti inkişafı üçün vacib idi. Hadisələrinnövbəti inkişafı isə o deməkdir ki, böyük ehtimalla, Laçın qapısından yenə qanunsuz daşımalar həyata keçiriləcək və bu vəziyyətdə rəsmi Bakı artıq özü Laçında ciddi rejimli sərhəd-gömrük keçid məntəqəsinin qurulması üçün imkan əldə edəcək. Yəni, bütün bu işləri rusların əli ilə etməyimiz, sabah bir neqativ hadisə baş verəcəyi halda, onları bizim qarşımızda həm gözükölgəli, həm də diliqısa edəcək. Bu da, çox önəmlidir”.
Partiya sədri vurğulayıb ki, sevindirici hal həm də bundan ibarətdir ki, Azərbaycan rəhbərliyi Laçın qapısında nəzarət-keçid postu qurmaq, yola nəzarət etmək planında israr edir və ölkəmizin ərazi bütövlüyü və suverenliyi baxımından ciddi təhlükəsizlik riski yaradan bu problem yaxın zamanlarda birdəfəlik həllini tapacaq: “Zəngəzur dəhlizinin hələ də işə düşməməsi fonunda “Laçın dəhlizi”nin ermənilərə xidmət göstərməkdə davam etməsi haqlı olaraq Azərbaycan cəmiyyətində əsaslı qıcıq doğurur və buna son qoymaq lazımdır”.
