O, Azərbaycan Xalq Cümhuriyyətinin nümayəndə heyətinin tərkibində Paris Sülh Konfransında iştirak etmək üçün Fransaya gedir və AXC-nin süquta uğraması ilə bir daha geri qayıda bilmir. Sovetlər həmin tərkibdəki aydınlarımızın ölkəyə girişinə yasaq qoymaqla yanaşı, burdakı qohumları ilə də əlaqəsini kəsməyə çalışır. Ona yardım etdiyi üçün Üzeyir Hacıbəylini ev və göz dustağı edir. Dahi bəstəkar "nuri-didəm" deyə çağırdığı qardaşına yardım edə bilmir. Ceyhun Hacıbəyli çox uzun müddət aclıq və səfalət çəkir. Bütün təzyiqlərə baxmayaraq, dəyərli aydınımız son nəfəsinədək Azərbaycan üçün çalışmaqdan vaz keçmir. 3 fevral 1891-ci ildə Şuşa şəhərində anadan olmuş Ceyhun Hacıbəyli 22 oktyabr 1962-ci ildə Parisdə vəfat edir.

Azərbaycan Yüksəliş Partiyası olaraq alim, siyasətçi, jurnalist, bir-neçə dil bilən bu dahi aydınımızı dərin sayğı ilə yad edirik.