Bugünkü Azərbaycan xalqının yaddaşında 20 Yanvar hələ ki faciədir, qandır, acıdır. O hələ də qərənfillərlə, göz yaşı ilə simvolizə olunur. Bu, təbiidir, çünki bu gün 20 Yanvarı yad edənlərin böyük əksəriyyəti həmin hadisənin şahidləridir. Amma gələcək nəsillər üçün 20 Yanvarın əsl mahiyyəti açılmalı, onun tarixi əhəmiyyəti, hər xalq üçün qürur mənbəyi ola biləcək tərəfləri nəsildən-nəslə ötürülməlidir. Artıq həmin nəsillər üçün 20 Yanvar ney-kaman səsi, qərənfillərlə müşahidə olunmayacaq. Uvertüralar və marşlar, sayğı duruşları ilə anılacaq.

Marşlar və cəngilər kaman və ney səsini üstələməlidir. Kədərli sayğı duruşlarını qürurlu duruşlar əvəz etməlidir, çünki 20 Yanvar heç bir ordunun, heç bir silahın vətən sevgisindən, azadlıq istəyindən daha güclü olmadığını, olmayacağını göstərməkdədir.
20 Yanvar Azərbaycanlıların dirilişiydi.

20 Yanvar məhz dövlət qurulması yolunda qaçılmaz, qanlı, lakin şərəf və qürur duyulacaq mərhələdir, Azərbaycan xalqının həyatında.

Unutmayaq ki, müstəqil ölkənin gəncliyi, şəxsiyyəti kədərlə, acıyla VƏTƏNDAŞ kimi yetişdirilə bilməz. Gözlənilən bütün dalğalar qarşısında Azərbaycan Gəncliyi mübarizə ruhunda yetişdirilməlidir.

Bu mübarizədə uğurumuzu şərtləndirəcək əsas meyarlardan biri də milli şüura sahib, milli kimliyini bilən, milli təfəkkürlü azad vətəndaşların və gəncliyin varlığıdır.

20 yanvar haqqında düşüncələriniz doğru formalaşsın deyə sizə bu müraciəti ünvanladım. Sizə güvənir və inanıram ki, tariximizi daha doğru şəkildə gələcəyə daşıyacaqsınız!

Yaşasın Azərbaycan Gəncliyi!