Şuşada etiraz aksiyaları ilə bağlı xalqımızın narahatlığı başadüşüləndir, çünki rus bu dəfə "sülhməramlı" olaraq qapıdadır.
200 illik siyasəti dəyişmir, sadəcə hər dəfə işğalçı obrazını dəyişir.
Bu baxımdan da Rusiya bütün gücüylə Azərbaycan insanının nifrətini qazanmağa davam edir.
İki ildir, deyirik ki, Rusiya açıq şəkildə ittiham olunmalıdır. Səbəbi isə çox sadə - Qarabağda hazırda ən önəmli problemlərin başında Rusiya hərbçilərinin ərazidə mövcud olması, sülhməramlı missiyasından uzaq davranış sərgiləməsi, uzun illər bölgədə qalacaqmış kimi hazırlıqlar görməsi, Ermənistandan rus sülhməramlılarının nəzarətindəki ərazilərə silah-hərbçi daşımasını təmin edərək separatçıları silahlandırması və bununla da regionda qalmaq naminə mübarizə aparmasıdır. Regionda qalmağın tək yolu isə münaqişənin davam etməsidir. Əgər separatçılar bölgədən təmizlənərsə, sərhəd xətlərinin müəyyənləşməsi prosesi başa çatdırılarsa, ardından qarşı tərəf sülh müqaviləsinə məcbur edilərsə (anti-terror əməliyyatından sonra bunu icra etməmələri mümkünsüzdür), artıq sülhməramlıların da varlığına ehtiyac qalmayacaq.
Bu addımlar həm də bizim daim səsləndirdiyimiz vasitəçisiz danışıqlar prosesinin icrasına təkan verəcək. Bu isə heç bir halda Rusiyanın maraqlarına cavab vermir. Rusiya Qafqazda daim qan ocaqları yaradıb, şantaj mövqeyi tutub, savaşan tərəflərini bir-birinə qanlı düşmən edib, soyqırımları törədib. İndi məşhur kinodakı məşhur sual kimi olmasın, siz deyin, axı, bunları edərkən necə "xoşməramlı" "sülhməramlı" olmaq olar?!
Qısacası, sülhməramlı sözü ilə Rusiya ifadəsi arasında yaxından-uzaqdan heç bir siyasi bağlantı ola bilməz.
Bu baxımdan da "sülhməramlılara" qarşı keçirilən etiraz aksiyalarını publik olaraq müzakirəyə çıxarmağı qətiyyən doğru hesab etmirəm. Çatışmazlıqlar və qüsurlar düşmənlə üzbəüz durarkən danışılmaz. Həm də dostlar, etiraz aksiyaları elə mahiyyətcə primitiv olmalıdır. Hə, müəyyən məsələləri fərqli etmək olardı, amma bu, sonra öz aramızda aparacağımız söhbətlərdir.
Heç kim unutmasın, Azərbaycan xalqı müstəqilliyini qazandıqdan sonrakı 30 ildə Rusiyaya qarşı həm müstəqilliyini, həm suverenliyini qorumağa çalışır və bu mübarizədə dirəniş göstərir.
Bu 30 ildə Rusiya da eyni israrla xalqımıza qarşı öz məkrli siyasətində dirəniş göstərir.
Amma uduzacaq! Bəli uduzacaq!
Bu dirənişə ironiya etmək isə xalqa qarşı sayğısızlıqdır. Gün həmrəylik, birlik günüdür.
Azərbaycan Yüksəliş Partiyasının başqanı Anar Əsədli
