Turan etniküstü hərbi, siyasi, iqtisadi dövlətlər birliyidir

Ərdəbillərin ləhcəsiylə desək, bir qrup "pəlitolox" yenə başlayıb ki, Türk dövlətlərinin başında duran şəxslər Turanı qura bilməzlər.

Çünki onlar demokrat deyillər, hətta Turanı "talan edərlər", - deyə etiraz edənlər var. 

Sizdən fərqli olaraq ironiyasız, hətta söyüşsüz cavabım: 

Birincisi, sizin məntiqinizlə hər hansı Türk dövlətinin korrupsiya və rüşvətə bulaşmış başçısı Turan olmadan da dövlətini talan etmirmi? 

İkincisi, Turanın qurulmasını labüd edən zamandır. Yəni, bu dövlətlərdə dövlət başçısının dəyişməsi Turana gedən yolları qapatmayacaq. 

Bu səbəbdən də həmin dövlətlərin vətəndaşları öz ölkələrində demokratik sistem qurmaq niyyətindədirlərsə, bunun Turana nə dəxli? 
Turan regionda etniküstü hərbi, siyasi, iqtisadi dövlətlər birliyidir. Ora daxil olan dövlətlərin demokratikləşmə prosesi həmin ölkələrin daxili işidir. 

Məsələləri qarışdırmayın. 

Və nəhayət, Turan bir qrup fanatik türkçünün ortaya atdığı romantik ideya deyil. Əksinə, kapitalizmin labüd etdiyi birləşib güc olmaq və ya indiki məşhur ifadə ilə desək, "Biz birlikdə güclüyük" praktik ideyasından doğan vacib nəticədir. 

Buna gülən, romantizm qalığı kimi baxanlar isə siyasi prosesləri bilməyənlərdir. 

Bir məsələyə isə xüsusi diqqət edək: Bu gün Turanın yaranmasında iştirak edən siyasi liderlərin heç biri milliyyətçi cinahın nümayəndəsi deyil. 

Yəni, xanımlar və cənablar! Turan artıq bir ideologiya deyil, bunu qəbul edin. 

Necə ki, millətçi cinahda olmayanlar bu gün TURANI qururlar.

Anar Əsədli
Azərbaycan Yüksəliş Partiyasının Başqanı