Bir neçə gün əvvəl bir yeniyetmənin Bakı şəhərinin Xətai rayonu, 3 saylı Uşaq Evində yeməyin azlığından, uşaq evinə aid qidaların oğurlanmasından və uşaqlara fiziki zorakılıq hallarından şikayət etdiyi video görüntülər yayılıb.
Video-müraciət cəmiyyətdə kifayət qədər səs-küy və rezonans doğurub. Elə bundan sonra, ikinci bir xəbər yayıldı ki, həmin yeniyetmə guya anlaqsız vəziyyətdə olması, psixi durumunun yerində olmaması səbəbindən məcburi qaydada hansısa ruhi xəstələrin müalicə müəssisəsinə yərləşdirilib.
Öyrəndiyimiz qədərilə artıq müvafiq sahəyə cavabdeh olan dövlət qurumu operativ şəkildə olayın üzərinə getməklə, müəyyən məsələlərə aydınlıq gətirib. Ancaq bununla belə, baş vermiş hadisəyə münasibət bildirməyi AY Partiya olaraq özümüzə borc bilirik.
AY Partiya bir uşaq evində, videoda iddia olunan qanun pozuntuları, uşaqlara natamam qida rasionu, qidaların oğurluğu, uşaqlara qarşı fiziki zorakılıq hallarını şiddətli şəkildə pisləməklə yanaşı, aidiyyəti qurumları həmin Uşaq Evini vaxt itirmədən araşdırmağa və yoxlamağa çağırır.
Ümumiyyətlə, valideyndən məhrum olmaq hər bir uşaq üçün kifayət qədər ruhsal və həssas məsələdir. Atasız-anasız olan belə uşaqların böyüdüyü müəssisələrdə yaşayış şəraitinin qənaətbəxş durumda olmaması, total nəzarətsizlik yolverilməzdir. Bu müəssisələrdə rəhbər vəzifələrdə işləyən şəxslər öz vicdanlarını və insanlıqlarını nə qədər itirməlidirlər ki, ölkəmizə vətəndaş böyüdən və yetişdirən qurumlarda belə rəzalət yaşanır. Bir yeniyetmənin sadalanan problemlər barədə ictimaiyyətə müraciət etdikdən dərhal sonra "dəli" adlandırılıb dəlixanaya yatırdırılması isə hardan baxsaq, mənəvi aşınmasın son həddi olsun gərək.
"Sağlam millət - sağlam gələcək" deməkdir. Uşaqlar bizim gələcəyimizdir və onların ləyaqətli böyüməsi hər kəsi narahat edən məsələ olmalıdır. Yetişməkdə olan gənc nəslin sağlamlığının təmin edilməsi, intellektual və mədəni səviyyəsinin yüksəldilməsi, onların vətənpərvərlik hisslərinin tərbiyəsi, əməyə, vətənin müdafiəsinə hazır olan mərd, cəsur insanlar kimi yetişməsi hərtərəfli qayğıdan keçir. Bunu təmin etmək respublikada fəaliyyət göstərən bütün Uşaq Evlərinin bir nömrəli vəzifəsidir. Təsadüfi deyil ki, tarixi zəfərlə bitən 44 günlük Vətən Savaşında şəhid olan Səbuhi Əhmədov da şüurlu həyata məhz uşaq evindən qədəm qoymuşdu.
AY Partiya bir daha aidiyyatı dövlət qurumlarına, ələlxüsus da uşaq evlərinin, internatların rəhbər şəxslərinə, personalına xatırladır ki, hamımız uşaqlarımızın və gənclərimizin taleyi üçün məsuliyyət daşıyırıq. Valideyn himayəsindən və qayğısından məhrum qalmış uşaqlarımızla davranış şəklinə görə isə iki dəfə artıq məsuliyyətli və ehtiyatlı olmaq lazımdır.
AY Partiya baş vermiş bu hadisəni nəzarətdə saxlayacaq.
Anar Əsədli
AY Partiya Başqanı
