Bu gün Azərbaycan aktyorluq məktəbinin görkəmli nümayəndəsi, ustad sənətkar Nəsibə Zeynalovanın doğum günüdür.
Nəsibə Cahangir qızı Zeynalova 20 aprel 1916-cı il tarixində milli realist teatr məktəbinin banisi Cahangir Zeynalovun ailəsində dünyaya göz açıb.

Orta məktəbdə oxuyarkən incəsənətə meyilli olan Nəsibə xanım sənətin, eləcə də rəqsin sirlərinə yiyələnir. 1932-ci ildə milli kino və teatr sənətinin ustadı, rejissor-aktyor Rza Təhmasibin dərnəyinə üzv olur, 1938-ci ildən isə Azərbaycan Dövlət Musiqili Komediya Teatrında aktrisa kimi fəaliyyətə başlayır.

Nəsibə xanımın ifa etdiyi rollardakı yumoristik eyhamlar, səs tempri, səhnə hakimliyi gənc aktyor nəslinə uzun illər örnək olub, bir məktəb yaradıb.

Böyük sənətkar səhnədə, filmlərdə, televiziya tamaşalarında saysız-hesabsız müxtəlif çalarlı rollar yaradıb, yeni sənətkarlıq ənənəsinin bünövrəsini qoyub.

Özünəməxsus ifa tərzi, yumoristik replikaları ilə yaddaşlarda yaşayan Nəsibə Zeynalova 10 mart 2004-cü il tarixində dünyasını dəyişib.

Azərbaycan Yüksəliş Partiyası milli teatr və kino sənətinin sevilən sənətkarı Nəsibə Zeynalovanın xatirəsini sayğı ilə yad edir.