Ötən gün Saatlıda içməli su probleminə görə aksiya keçirən, yolu bağlamağa cəhd edən Orta Muğan və Nabatkənd sakinlərinə qarşı rezin dəyənək və güllələrdən istifadə olunması nəticəsində vətəndaşlarımızın ağır xəsarət alması, bir neçə aksiyaçının saxlanılaraq, polis şöbəsinə aparılması xəbərləri bizi çox üzdü.

Əvvəlcə onu vurğulayım ki, haqqını tələb edən, problemin həll edilməsi üçün aksiya keçirən vətəndaşlara qarşı polisin belə amansız münasibət qəti şəkildə yolverilməzdir.

Saatlıda, ümumiyyətlə, Aran bölgəsində içməli su problemi illərdir, mövcuddur. Bununla bağlı sakinlər müxtəlif vaxtlarda etiraz aksiyaları keçirsələr də, aidiyyəti orqanlar problemi hələ də həll etmir. Bölgədə su qıtlığının yaranmasının obyektiv və subyektiv səbəbləri var, bunu hər birimiz bilirik, amma məsələ burasındadır ki, sadə camaat ağacının dibinə tökməyə bir vedrə su tapa bilmir, bütün istəyi, etirazı bununla bağlıdır.

Vətəndaşın günlük ehtiyacı olan su probleminin illərlə həllini tapa bilməməsi haqlı və ciddi narazılıq, hiddət doğurur.

Sabirabadın Çölbeşdəli sakinləri də 7 ay öncə eyni tələblə aksiya keçirmişdilər. Görünən odur ki, cavabdeh orqanlar problemi həll etmək niyyətində və ya iqtidarında deyil. Buna görə də sakinlər növbəti dəfə səslərinin eşidilməsi üçün aksiya keçiriblər. Nəticədə dünənki qarşıdurma yaranıb.

Xalqın problemlərinin həlli polisin dəyənəyində, rezin gülləsində axtarılmamalıdır. Saatlı rayonunun İcra Hakimiyyəti, kənd icra nümayəndələri, problemə birbaşa məsul olan su təsərrüfatı qurumları, yerli özünü idarəetmə təşkilatları, Saatlının millət vəkili haradadır ki, camaatın qabağına polis, hüquq-mühafizə orqanları çıxarılır? Su problemini polis, prokuror, təhlükəsizlik xidməti əməkdaşları həll edir bölgələrdə? Əlbəttə yox.

İcra hakimiyyətləri yanında ictimai şuralar yaradılıb. Onlara hara baxır bəs?

Ombudsman niyə getmir hadisə yerinə?

Hesab edirəm ki, bu kimi olaylar onsuz da ağır vəziyyətdə olan xalqın qəzəbini daha da artırır. İranın, Rusiyanın ölkəmizə qarşı artan təhdid və təzyiqlərinin qarşısında hakimiyyət orqanları vətəndaşları qıcıqlandıracaq, qəzəbləndirəcək üsullardan əl çəkməsə, səslərini eşidib elementar tələblərini yerinə yetirməsə, aksiyalar, etirazlar məcrasını dəyişə, sonda idarəolunmaz xaosa çevrilə bilər.

Vətəndaşlarla görüşün, onları dinləyin, su verə bilmirsinizsə, heç olmasa, nifrət, şiddət, aqressiya yaratmayın.