Laçın yolunun artıq ikinci gündür, bağlanması nəticəsində, təbii olaraq, erməni siyasi həyasızlığı baş qaldırıb. Ard-arda uydurma erməni dezinformasiyaları, panik yalan məlumatları ilə rastlaşırıq.

Bunlardan biri də guya Xankəndidə dərman preparatları çatışmazlığının yaranması və xeyli sayda ağır xəstənin olması barədədir. Sən demə, onları təcili İrəvana çatdırmasalar, ölüm-itim olacaq, aləm dəyəcək bir-birinə. Əlbəttə, bütün bunlar, bir daha qeyd edirik, erməni "əzabkeş"liyindən əmələ gələn tipik bir həyasızlıqdır, xislətdir. Bu kimi araqızışdıran mövzular gündəmi tutmasın deyə, Azərbaycan dövləti preventiv addımlar ata bilər. Azərbaycan hökuməti guya yaranacaq humanitar böhrana və bundan qaynaqlana biləcək beynəlxalq skandala səbəblər olmasın deyə, Xankəndinə təcili surətdə tibbi personal və zəruri dərman preparatları göndərsə, məncə, erməni uydurmalarının və bəhanələrinin qarşısını almaq mümkün olar. Hətta deyək ki, quru yolu daşımalarında problem yaradılırsa, suveren hava məkanımızdan istifadə etməklə də, helikopterlər vasitəsilə bunu etmək mümkündür. Bununla da, dövlətimizin nümunəvi humanist davranışı dünya ictimaiyyətində də müsbət qarşılanar, sülhə kimin mane olduğu bir daha aydın olar. Həm də rəsmi Bakı bu yolla Xankəndidəki erməni əsilli vətəndaşlarının yanında olduğunu nümayiş etdirmiş olar.

AY Partiya Başqanının siyasi məsələlər üzrə müavini Rəşad Bakuvi